«»Мираҫ» фольклор көйҙәре халыҡ ансамбленең юбилейын ҡаршылап» рубрикаһы дауам итә. Бөгөнгө рубрикабыҙҙа «Мираҫ» фольклор көйҙәре халыҡ ансамбленең гармунсыһы, РСФСР-ҙың һөнәри-техник белем биреү отличнигы, Рәсәй Федерацияһының хеҙмәт ветераны, Башҡортостан Республикаһының атҡаҙанған мәҙәниәт хеҙмәткәре Башаров Әҙип Абусәлих улы. Әҙип Абусәлих улы Теләпән ауылында тыуып үҫкән. Һөнәри белемен Башҡорт ауыл хужалығы институтында ала. Уҡып ҡайтҡас район ауыл хужалығы профсоюзы комитетында инструктор-ревизор, «Белем» район ойошмаһында яуаплы сәркәтип, 86-сы ауыл хужалығы һөнәри-техник училищеһында уҡытыусы, директор урынбаҫары вазифаларында эшләй. Әммә сәнғәткә ғашиҡ булыулығы уны мәҙәниәткә өндәй. Төп эше менән бер рәттән район үҙешмәкәр сәнғәт түңәрәктәренә лә йөрөй. 1967 йылны район бейеү ансамблендә бейей башлаған, буласаҡ тормош иптәше менән дә ошонда таныша. «Мираҫ» ансамблен ойоштороуҙа ҡатнаша. Ансамбльдә ете төрлө гармунда уйнай: саратов, баян, хромка, тальян һәм өс кесе гармун. Кескәй гармундарҙы уға Куйбышев ҡалаһында ғүмер итеүсе музыкант, гармундар яһаусы оҫта Рауил Мәғрүпов эшләп бирә. Рауил Мәғрүповҡа был гармундарҙа уйнаған кешене осратырға тура килмәй. Бары тик «Мираҫ» ансамбле Куйбышев ҡалаһына конкурсҡа барғас, Әҙип Башаров менән танышып алалар һәм Әҙип ағай кескәй гармундарында көйҙәр уйнап күрһәтә. Ә ҡайҙан өйрәнгән ул был гармундарҙа уйнарға?.. Яуап бер – ул талант. Кесе саҡта күрше малайына гармун алып биргәс, Әҙип ағай ҙа дуҫының уйнауына һоҡланып, мәктәптә уҡытыусыһынан гармун алып уйнарға өйрәнә. «Йәйғор» бейеү ансамбленең ойоштороусыһы ла, бейеү ансамбленә районда беренселәрҙән көйҙәр уйнаған ансамблде лә булдырыу — Әҙип Башаровтың хеҙмәт емеше. Бөгөнгө көндә, сәләмәтлек менән бәйле сәбәптәр арҡаһында, «Мираҫ» ансамбленә күпселек ҡунаҡҡа йөрөй. Гүмер буйы гармун телдәрен тибрәтеүсенең бармаҡтары ул моңдарға нисек түҙһен, ҡайһы саҡта сәхнәләргә сығып өҙҙөрөп уйнап та ебәрә. Бөгөн дә ул түҙмәне, гармун телдәрен тибрәтте.